Cwestiynau Cyffredin - Pleidleisio drwy ddirprwy

• Pwy all wneud cais am bleidlais drwy ddirprwy?

  Ni allwch wneud cais am bleidlais hirdymor trwy ddirprwy heb fod â rheswm penodol fel anabledd neu os ydych chi dramor.

  I bleidleisio trwy ddirprwy mewn dim ond un etholiad, rhaid i chi gael rheswm, er enghraifft y byddwch ar wyliau neu i ffwrdd oherwydd gwaith.

  Os ydych yn mynd yn analluog neu’n sâl yn ddirybudd, gallwch wneud cais i bleidleisio drwy ddirprwy am resymau meddygol hyd at 5yh ar ddiwrnod y bleidlais.

  I lawrlwytho ffurflen gais i bleidleisio drwy ddirprwy, ewch i'n tudalen ar sut i bleidleisio drwy ddirprwy sy'n addas i'ch sefyllfa chi

• Mae perthynas / cyfaill wedi mynd yn analluog / sâl yn ddirybudd. Allaf i bleidleisio ar ei ran / rhan?

  Gallwch wneud cais i bleidleisio drwy ddirprwy mewn argyfwng am resymau meddygol hyd at 5yh ar y diwrnod pleidleisio.

  I lawrlwytho ffurflen gais i bleidleisio drwy ddirprwy mewn argyfwng, ewch i'n tudalen ar sut i bleidleisio drwy ddirprwy.

• Sut wyf yn cael pleidlais drwy ddirprwy?

  Gallwch wneud cais am ddirprwy newydd hyd at 6 diwrnod gwaith cyn etholiad, a gallwch newid pleidlais bresennol trwy ddirprwy ar unrhyw adeg hyd at 11 diwrnod gwaith cyn y diwrnod pleidleisio. Os ydych yn mynd yn analluog neu’n sâl yn ddirybudd, gallwch wneud cais i bleidleisio drwy ddirprwy am resymau meddygol hyd at y diwrnod pleidleisio. Rhaid derbyn holl geisiadau cyn 5yh ar y diwrnod a nodwyd.

  I lawrlwytho ffurflen gais i bleidleisio drwy ddirprwy, ewch i'n tudalen ar sut i bleidleisio drwy ddirprwy.

• Pwy all fod yn ddirprwy i mi?

  Gall pawb sy’n gymwys i bleidleisio eu hunain yn yr etholiad fod yn ddirprwy i chi. Fodd bynnag, ni allwch fod yn ddirprwy i fwy na dau o bobl nad ydynt yn aelodau o’ch teulu agos. Gall eich dirprwy wneud cais i bleidleisio drwy’r post ar eich rhan.

  I gael rhagor o wybodaeth, cysylltwch â’ch swyddfa cofrestru etholiadol lleol

• Cefais fy ngwneud yn ddirprwy dros rywun. Beth sydd angen i mi wneud?

  Mae’n hawdd iawn pleidleisio fel dirprwy rhywun. Byddwch yn derbyn cerdyn pleidleisio drwy ddirprwy arbennig gyda manylion lle ddylech fynd i bleidleisio. Os na allwch fynd i’r man pleidleisio, gallwch bleidleisio drwy’r post. Rhaid i chi wneud cais am bleidlais drwy’r post fel hyn cyn 5yh ar yr 11eg diwrnod gwaith cyn y diwrnod pleidleisio. Cysylltwch â’ch swyddfa cofrestru etholiadol lleol i gael gwybod sut i wneud hyn.

  Os ydych yn mynd i’r man pleidleisio, dywedwch wrth y staff yno eich bod yn pleidleisio fel dirprwy, a byddant yn dweud wrthych beth i’w wneud. Peidiwch ag anghofio mynd â’ch cerdyn pleidleisio drwy ddirprwy - bydd hyn yn ei gwneud yn haws i staff y man pleidleisio gael hyd i’r papur pleidleisio cywir.

• Beth sy'n digwydd ar ôl i mi wneud cais?

  • Rhaid i’ch dirprwy fynd i’ch man pleidleisio lleol i bleidleisio. Os na all eich dirprwy fynd i’r man pleidleisio, gall wneud cais i bleidleisio ar eich rhan drwy’r post. Gall eich dirprwy wneud cais i wneud hyn hyd at 11 diwrnod cyn diwrnod yr etholiad. Gall eich swyddfa cofrestru etholiadol roi mwy o fanylion i chi am hyn.
  • Bydd eich dirprwy'n derbyn cerdyn pleidleisio drwy ddirprwy, sy'n dweud wrthyn nhw ble a phryd i bleidleisio.
  • Rhaid i chi ddweud wrth eich dirprwy sut ydych eisiau pleidleisio, er enghraifft, i ba ymgeisydd neu i ba blaid.
  • Os byddwch yn gallu mynd i’r orsaf bleidleisio ar ddiwrnod yr etholiad, gallwch ddal i bleidleisio mewn person, cyn belled â bod eich dirprwy heb wneud hynny eisoes, nac wedi gwneud cais i bleidleisio drwy’r post ar eich rhan.